Sacranon! Atu capì che raza de tema che avon sto giro? In verità, se pense ala religion te la storia, la è sempre stata an afar serio. Se pol dir che, da quando che Gesù l’è rivà sula tera, l’è scominziada na nova epoca abastanza… come dir… divisiva.
Chi che ghe corea drio par scoltarlo, e chi che ghe corea drio par ciaparlo… e meterlo in cros. Lu (sto pore Cristo) al se ha proà a spiegarne che, olendo, se pol olerse ben; che co ‘n poche de regole sane se avarie podest darghe an senso a sti quatro dì che ston a sto mondo. Ma sicome no tuti i era d’acordo (come sempre, del resto) savon tuti come che la è ‘ndata a finir…
Dopo an bel tot de ani, fra santi omi (e femene) e governanti besùc(1), fra Crociati e Missionari, fra Papi… par forza (e senza scorza) e Papi… come Francesco, sion ancora (quasi) punto e capo.
Olendo tornar coi pié par tera, cioè qua a Belun, anca par noi co se era boce la division la era fra la compagnia del Prete… e quela del Bar.
Mi no so ben che che l’era che ne fea eser da na parte pitost che da quel’altra, de seguro la fameia la iutea (anca se, a dir la verità, mi a casa ho sempre sentì pì sirache(2) che rosari). E alora noi se ‘ndea a rosari e quei “del Centrale” i tirea le castegne mate su par al roson dela Cesa. Noi se sarie stati i “bravi tosat”, anca se là le nostre matanade le avon fate, eccome. Me pense ancora ades che la cioca pì granda la ho fata a quindese ani, co ho catà le boze(3) scondeste da quei pì grandi che parecea al presepio. Noi sion quei che i è gnesti su senza tanti “parché”, solo “Parché… de sì!”.
Comunque, a dir la verità, ades se me varde indrio, no me sente proprio così… indrio. Anzi, fursi me sente parfin fortunà de aver sieldest de proar a eser an bon cristiàn (anca se le posibilità le era poc pì che doi, altro sì che al dì de incoi). O, magari, aveeli e ali rason quei che dis: «Questo no, zerte robe no le va pì ben, ghe ol pì libertà e manco regole, la religion asonghela ai preti»? Fursi i ha rason… ma fursi… Mi son content de aver la me piciola fede.
Che po’ sta paroleta la significa solo che me son fidà de chi che me ha iutà a capir che no sion solo cellule ben organizzade. Ghen è tante robe che no capison, e dove che finis al zervel, al ragionamento, la sienza (grandi pì che mai), dove che no se ghe riva pì a capir … o te te fida, o te te inrabia, o te fa finta de gnent. Mi, me fide
Bone speranze a tuti.
