Questo l’è al fatto! E questo me fa gner le fumane0, ma anca i sgrisoi!2 Calt e fret, fogo e giaz. Giaz, che l’è de seguro tel cor de chi che continua a mandar omi a copar i boce. E ‘l trova i schei par demolir… e l’ha già la fila de quei che ciaparà i schei par ricostruir.

Il fiore della pace

La sioreta bionda che ne governa la ha dita quel’altro dì par television (convinta!): “Chi vuole la pace, prepara la guerra” (riprendendo il noto motto latino “si vis pacem para bellum”) e ancora “La debolezza invita (??) l’aggressore, la forza allontana (!!) l’aggressore!”. Alora… la sarà anca pratica (o pragmatica, come che se lède in giro) ma mi no vede che sione drio far chissà che progressi… a voi ve parelo che? E no ghen farie na question de macismo o de buonismo, ma de umanità.

Chi che l’è pì bravo de mi, al è drio proar a capir parché che no se scaldon, anzi, no se infiamon, co sentison ste robe, insoma… parché che avon fret, o, pedo, sion fredi… intro. Se se avese solo fret, bastarie an bel pararece, guanti, barete, piumin e scarpoi e se podarie de seguro sentirlo manco. Ma co sion fredi, alora no avon gnanca voia de levarse su dala poltrona, de far doi salt, na corseta, quatro sganasade, na sbaregada o na cantada. Opur de proar a parlarse, ris-ciando magari de capirse o, adiritura, de olerse ben (prima de tut a noi e po vanzarghen anca par qualcheduni altro).

Avon la possibilità (e la fortuna, guadagnada col sacrificio dei nostri avi) de poderlo far, de eser l’antigelo par noi prima de tut e po par chi che monta su sula nostra Corriera che comunque la va, intant che vivon.

E alora, sofion su le bronze3 (e se serve doperon anca la diavolina) ma tegnon viva sta fiama che scalda, così che, automaticamente, da che mondo l’è mondo, te vedarà che atorno al fogo se cataron in tanti, e pì fret che l’è, pì vesini ston… parché ghen avon proprio bisonch.
An strucòn a tuti par an domilavintisie de pace e… fon meio che se pol!