Su in contrà de “L’Acqua Ciara” solo i vèci ze restà!”
Questo lo scrivèa e lo cantèa profeticamente, già zhinquanta ani fa, il grande Bepi De Marzi, compositor e direttor del coro dei Crodaioli. Verità che ntel giro de sessanta ani la se ha concretizzà. Col generale stravolgimento del percorso sociale de sto ultimo mèdo secolo, i paesét dela montagna e pedemontana i se ha pian-pian svodà. “Solo i vèci ze restà”. E svodàndose le case e le intiere contrade, avon svodà anca al senso de comunità che è restà lassù fra i stàoi, i cortivi, i cèssi, i biavèr, i pòrtighi, i ledamèr e i broli che era i spazi de vita dela nostra dènt e dei nostri vèci. Si, entro nten sti nìt scorèa la vita semplice, lenta ma viva. Na vaca, na càora, an porzhèl, qualche pita e an ninzhiol de tèra fèa sì che vivesse na famejòla. Questa l’era la magra ma comune economia de ste contrade. Ancoi sta impensabile strutura economica la è sepolìda da tempo o, se-mai, relegada entro librét de Storia o racconti de qualche nostalgico come mi.

Ma che rendèa vivi sti borghi no l’era solche al cantar del gal o dele pite che avèa pena fat l’ovo, al mular dela vaca ntel stàol che reclamèa na brazhàda de fien, al rognar del porzhèl che avèa svodà al lèbo dal scolo. La pì bèla musica la vegnèa sonada dai tosat e dale tose sempre tanti e fissi parché le coppie de sposi le era ancora prolifiche e generose. I cortivi e i broli, veri parchi giochi, i era invasi da coàde de bòce che dughèa a tana o scondicuk, al campanon, ai sassét, a salta musséta, a patìna o spuzha, a capàne, a archi e frecce, a gare su e do dai alberi come tante de schirate. Fin che verso l’imbrunir, doi fis-ciade o na osada dele mame le ciamèa a racolta i fioi. Na sguataràda ntel rojét o ntela fontana publica e po’ tuti a rosàri che la sagrestana la avèa già sonà da n tòc i bòt dele avemarie!

Me par de èsser drio descriver an presepio, an quadro, an film de fantascienza e invezhe son drio sentir e scriver emozhion e momenti dela me infanzia ben vivi ntela memoria. Scrive e parle de sessanta ani fa.

Ancoi, tanti de sti borghi i se ha svodà. E restà ortighe, porte sventrade, balcoi roti, pòrtighi vodi, qualche bissa e tante zheke! No ghe n’è pì rumori ma silenzio totale. Ma no quel silenzio dela montagna che te impienìss al cor de emozion. No; quel de ste case vode e cascanti l’è an silenzio sinistro, brut, trist, pesante e doloroso; an silenzio che fa mal al stomego parché no l’è stat sostituì co’n progeto de atenzion e de amor. Al posto dele borgate avon costruì ben poc o mèjo avon realizà tant, ma se son desmentegadi quel senso de comunità che no avèa bisogn de quasi gnint par viverlo. Anzi, proprio l’aver poc o l’essenziale, l’era la giusta benzina par condivider e spontaneamente relazionarse anca ntei longhi filò dela sera.

No avon però pèrs tut. Sicuramente qualcossa de bon avon salvà. I tornerà sti borghi, le tornerà a viver ste case dela montagna, tornerà i bocéte a corer a pié nudi sui prà. E qualche nova coppia de giovani coraggiosi o qualche abitante dele ormai invivibili città i è drio tornar a comprar e savajar-su sti spazi e sti ruderi ribandonadi da ani.
Forse na part pìciola de quela Pace che tuti i dì invocon, quela co la “P” maiuscola, forse, podon ancora cercarla fra sti mur de sass che, basta scoltarli, i ne parla ancora de comunità e de Pace vera.