Crede de aver scrit romai par al “Veses” na diesina de artìcoi sul Nadal e inventarse o rajonar su sta data cossì radicada sia ntela religion che ntela tradizion, rèsta na impresa abastanza impegnativa! E no tant par no saver cossa scrìver, ma de pì par scrìver concèti che no urte le cosienze e la sensibilità de quei che me lède. In sostanzha: òe da scrìver an cin de quel che pense o òe da incontentar al lèder dei tanti abonadi? Bèn, par sta òlta (come che ho sempre fat tute quel’altre òlte), sielde la prima: scrive quel che pense! Ho sessantanove ani e de conseguenza ho na vision e an sentor de ‘n Nadal an bèl poc diferente da quel de ncoi.

Na òlta al profumo del Nadal al scuminziéa co le doméneghe de Avento, intorno a San Nicolò o l’Imacolata. Ancoi al scuminzhia al dì dopo Halloween e cioè col primo de novembre che l’é al dì che noi se ghe ciamèa “Ognissanti”. Al temp de svodar le vetrine da scheletri, maschere e zhuke e l’é bèlche piramidi de panetoi e spumanti.

Na òlta, pena dopo la Madòna de dicembre, se partìa coi zhést a ndar a mus-cio par al presepio, pelando fràssen o sgrafando i sass dele roje. Ancoi, no savendo gnanca dove che nass o cress al mus-cio, le mame le lo compra mèdo sec e caro ntele botéghe che no te-te ingiazha gnanca le manine a procurartelo.

Na òlta i dì che precedèa la festa, se corèa a novéna tute le nove sere in césa. Adèss che la parola “novéna” quasi nissun sa cossa che la vol dir, la novéna se la fa corendo entro par i centri comerciali a comprar pensierin e regalin par quasi tuti, consapevoli che al pensier pì gross l’é al nostro ntel sielder qualcossa che al “regalando” no l’àbia già, parché tuti noi romai avon solche tut!

Na òlta se ndèa ala Messa de medanòt co na zhèrta devozhion e, confessadi qualche dì prima, se ndèa tuti, anca i òmi, ala comunion. Alora sì l’era Nadal vero! Ancoi l’ora de Messa e de comunion se tende a passarla sì vesin la césa ma ntel bar di fronte, incoconando brulè e prosecchi missiadi coi auguri.

Na òlta, anca par noi grandi, parlar de Gesù Bambin a Nadal l’era quasi an pronunciar an Mistero oltre che a esser na màna par i tosatèi che spetèa i pochi ma preziosi doni! Ancoi pronunciar al nome “Gesù Bambin” ne fa an cin vergognar davanti ai altri parché l’é robe de na òlta o da mame par i so fiolét. Pì pratico l’é parlar de “babbo natale”, personaggio che ne ha parà su la Coca Cola dei mericani e che fa anca tant bèl!

Na òlta fenì al pranzo del meodì se ndèa casandando dai parént a portar auguri! Ancoi avon bisogn de ciorse na bona mèda ora par dedicarse al cellulare e inviar pachi de messaggi de auguri, spéss de na banalità disarmante!

Na òlta, na òlta, na òlta… basta! Varda emerito scrivàn Enzo che ghe n’é anca “l’Ancoi” e no l’é sempre mal come che spess te pensa ti! Anzi, ghe n’é e sempre ghen sarà, tant de Bon e de Ben! Sto articolo se poderìa cancelarlo e riscriverlo nte na maniera girada sot-sora e vardando al bicér, né mèdo pien da na banda, né mèdo vodo da quel’altra.

In fondo e par fortuna, Nadal al vien ancora par tuti quanti e assonghe far al so mistier solche a Lu, a Gesù Bambin che l’é l’unico bon de méter na frégola de Nadal ntel cor de tuti noi.
Bon Nadal a tuti!