La natura da sempre la ha provedést che, già dai primi de marzh, le cunéte dele strade e le fiése che ghe fa da cornìse le sia starnìde de fiorét de stajon che ciàma primavera: campanèle e campanoi, primule, viole e pratoline. L’é ancora cossì anca ‘ncoi parchè la natura no’ la se stufa mai de ricordarne al so ciclo.

De sti ani però se fa an cin pì fadìga ntel’individuar sto spetacolo dei prà. Prima de tut parché, invezhe che mandar i tosatèi a cior su bei mazhét de fiorét par ornar altarin o cardenzhe de casa, on pì caro che i li varde ntel telefonin che l’é pì comodo e no i ciapa fret. Secondo parché, no essendo sti tosatèi usadi a ndar par le fiese, i farìe dificoltà a distinguer i fior dale scoazhe che anca lore le crea an quadro de tuti i color come na fioridura de metà lujo ntele nostre montagne.

Scoazhe in giro a dir al vero no ghe n’é mai mancà, ma sti ultimi ani le é deventade pì variopinte e vistose. I bossolòt dele bibite, verdi, aranciòi e rossi i é an spetacolo e i risalta ben sula lespa dàla. Le butilie de viero colorato anca bèle, le riflète ‘l sol e ‘l par che le brile! Quele de plastica, anca se ghe n’é tante, le é manco bèle parchè le é an cin tute compagne e senza color, a diferenzha dei pachét de cike che i é pieni de colori fantasia. Ultimamente va forte anca le mascherine “Covid 19” che ghe n’é de tanti tipi e le arichìss al panorama.

Sto periodo de marzh, par separar i fiorét dale scoazhe, ho deciso de ndar a cior su. No’ i fior…le scoazhe!
Me arme de sachét negro de naino, guanti de plastica, baréta fracàda, mascherina, giubét fosforescente e bàte le cunéte del circondario. L’é an mistier che me dà sodisfazhion e, fora che schèi, cate de tut. E mì cioe su tut! Beh, tut tut no a dir la verità. Le m… dei can quele varde de schivarle e le asse là a coltar le cunéte. Anca quele savajòte e fate su sui sachetin verdi le asse là parchè a dirla tuta quele proprio no ghe la fae!

La me sodisfazion l’é quela de girarme indrìo e veder solche i fiorét e basta. Massa bel! Sta pratica de racolta no l’é che la fae par far pulizia; no, no! La fae solche par procurar posto par le prossime che vegnerà butade via. Che no’ se iludone che sta pratica dei lanci dai finestrin dele machine o de trar le carte in tèra la finisse doman. No, savon ben da sempre che “la mamma degli imbecilli è sempre incinta” e de sto periodo la me par anca in controtendenza rispèto al calo demografico!

Qualchedun me ha dit: “Varda che ndarà a fenir che i te ciamerà “coso…scoazha”!”. Me ricorde che co’ ere bocia, qua a Santa Giustina girèa par le strade armà de carét, scoa e pala, an zherto N. Scoazha. An bon omét, de poche parole che te notèa anca par al so caminar zhòt a causa, crede, de ‘na bruta poliomielite. L’é passà pì de zhinquanta ani da quando che N. Scoazha no’ l’é pì con noi ma, pur praticando ‘na mansion cossì umile, l’é restà ntela memoria de tanti me coetanei e oltre.

E se a far, sepùr solche ogni tant, sto laoro deventesse “famoso” anca mì de modo che tanti i me ricordèsse ancora fra zhinquanta ani? Che bel che sarìa! O sone an cin massa ambizioso?!