800 038 499

Numero Verde gratuito

Email

info@ilveses.com

‘Na Onta e ‘Na Ponta

Nadàl

‘Na Onta e ‘Na Ponta

Nadàl

Sto an fa 67 Nadài. Tanti? Pochi? Giusti; quei che i é po!
Quanti bèi Nadài! Da quei co’ la lizha ntel spetar i bebèi e al mandolato de Gesù Bambin, a quei dele leterìne piene de promesse, infilade sot al piàto del papà, opur i Nadài dela messa de medanòt co’ i gnèa a svejarte ntel pì bel mèdo del son, o i Nadài condivisi con tolàde de ‘dént e parent che fenìa co’ l’agognato dolce dal nome “porcospino” tut ovi e butìro. E quanti altri ricordi e nostalgie, coi presepi sempre compagni ma anca sempre diversi de an in an e po’ le novene, rozhion, poesie, neve, mussét, feràde, cantorìe e tanta, tanta felicità!

L’é proprio vera che co’ se deventa vèci se torna an poc tosatèi. La memoria co’ i so ricordi e le so nostalgie la te porta indrìo ai primi o secondi ani de età. Del resto al Nadàl stesso al stimola tanti “se me pense na òlta…” de noi anziani, proprio parché al resta ‘n apuntamento speciale e unico, an contenitor de robe bèle e piene de autentico amor. Ma Amor de quel vero che in quel dì là al se palesa in tanti modi e maniere diverse che ognun de noi se sforza de interpretar.

Questo o questi i é i Nadài che me piass ricordar opur che la me memoria la ghe riva subito e sempre a focalizar. Del resto del temp passà se tende a ricordar sempre le robe bèle e positive sforzandose de incantonar quele brute e triste; tanto, le ferite e le so cicatrici, quele le resta par sempre senza ndar a ricercarle ntel temp passà. Quele le inzhende e le fa spizha so posta senza gnanca pensarghe.

Ma che Nadài podone ancora viver ancoi? De che Nadài podone gioìr sto an, se i nostri pensieri i é pieni solche de guère, distruzhion, migliaia e migliaia de lutti de tosàt mandadi a macelar gratis, de pandemìe, de economIe che ne preoccupa tuti con boléte sempre pì care e de tant, tant scur ntel cor, oltre che sule strade e ntele piazhe, che ne fa paura?

Gesù Bambin, avon ancora tant bisogn dei to preziosi bebèi e visto che no son pì an pupo o an tosatèl, ntela leterina invezhe de domandarte mandarin, straca ganasse o “Fereri”, fae domanda, se te pol, de portarne a tuti, altri doni o bebèi. Vèrdene an poc i òci oltre i messagi e le vacàde che continuon a contemplar ntei nostri cellulari e fa che i alzòne sti òci, ad amirar le nostre montagne, le stéle o mèjo ancora, a vardar ntei òci na persona che ha bisogn.

Vèrdene le rece e al posto dei ormai famigliari rumor dele machine, dei politici par television, dela pubblicità, del strèpito de zhèrte trasmission impostade sul gnint, fàne scoltar e gustar na nènia o pastorèla del Nadal, che la ne méte al cor in pace con Ti, con noi e coi altri.

Fane snasàr no’ solche i parfumi dei shampi, dei bagnoschiuma, dei dopo barba, dei sotto ascelle, dele saonéte ma fa che tornone a sentir e snasàr i profumi del mus-cio del presepio, al parfumo dei fior o dela polenta condivisa sora na tòla priva de telefonin! Fàne tocar con man, no’ solche i massa cellulari che avon tuti ntele scarsèle e che continuon a palpar tut al dì, quasi par sentirse rassicuradi solche al tatto e così colegadi a tut al pianeta. Fursi al contatto co’ na man fréda de na veciota, co’ la so pèl lissa e monesina o de n tosatèl ciot sul brazh opur an strucon o an bracciacollo al fiol, fursi sarìa an tocar, an palpar pì san, pì vero, pì calt e pì vesin al mondo ma quel che conta davéro!

E par ultimo fàne gustar an cin manco, del tut e del massa magnar che l’é deventà na guèra continua fra al sgionfarse e le feroci diete o cure par deventar pì magri, pì bèi e sempre pì tristi, intant che ancora ancoi avon mèdo mondo che patìss fam e malatìe con pupét che mor drio man come che fusse fasoi. Na roba vergognosa.

Eco Gesù Bambin; i zhinque sensi come tanti de bebèi da tornar a taràr, a sistemar, a bilanciar par provar, come in tuti i Nadài passadi pieni de leterine e promesse, a deventar an cin pì brai, pì boni, pì femene e òmi de “Buona Volontà”!

Bon Nadàl sempre e comunque a tuti.

Galleria Immagini

Acegli l’area tematica che più ti interessa oppure clicca sulla casa per ritornare alla Pagina Principale del sito.