L’argomento l’é vècio come al mondo: al trata de preti e cése. Apunto par questo pense che al sia poc atuale e che i pì tropi i sia alèrgici o al ghe interesse poc o gnint.
Come césa o messa intende però no’ tant l’aspèto dela “Fede”, o almanco no’ solche quela, ma de pì quel de comunità.

Ai me tempi (e co’ dìe cossì se trata de tanti ani fa) se spetèa la domenega come fusse ogni setimana Pasqua, tant la era vivesta. L’era l’unico dì che i te vestìa da “festa” e to mama tirèa fora: calzhetìn bianchi, scarpéte impatinàde, camiséta bianca stirada come si deve, farfalina, giachetina da festa e al papà al te spalmèa anca an cin de “brillantina” sui cavéi par netarse ben le man dopo averla spalmada sui soi!

Al sonàr dele campane da messa “granda” l’era na emozhion unica parché ala festa i sonèa triplo e sta armonia perfetamente intonada, che durèa anca vinti minuti in diverse riprese, la te impienìa al cor!

Tochèa ndar su prestin in césa se te olèa catàr posto ntei banchi e no star in pié. Noi tosatèi che se ndèa a servir la messa se-se catèa anca in diese/dodese vestidi con vesti e cotte. Cantorìe, che da spess cantèa, rendèa la cerimonia ancora pì solenne e la césa s-ciopèa fora tute le domeneghe da piena che la era.

Ma la part pì bèla (assando fora quela personale de Fede che ognun se coltivèa) l’era fora dela césa. An vespèr de omi, femene, tosate, giovinòti, tosatèi e qualche anzian (pochi, parché i anziani ndèa pì tròp a messa “prima”) i invadèa la piazza e tut al sagrato. E là tuti i se perdèa in saludi, ciàcole, novità, discorsi de parént, dughi de bòce, sorrisi e qualche làgrema. Intant rivèa anca al piovàn che tuti i riverìa con devozhion!

Comunità! Questa la parola e la realtà ormai quasi desmentegada e sicuramente fora moda che se creèa anca in grazia ale varie messe dela domenega. Comunità, scambio, vardàrse, parlàrse, tocàrse, pentonàrse, intrigàrse. Èsserghen fisicamente!

Alternative de ancòi ala messa dela festa?
Dormir fin le doi onde smaltir le strachézhe dela not de festa. An cin anca nervosi co’ le campane che, anca ancoi che se poderìe polsàr in pace, le sona (ùgnol no triplo) par ben zhinque minuti che sarìa da denunciar al prete! Far la griglia, che l’é na bela e bona roba par la fameja, ma comunque ristretta ala fameja solche e poc ala comunità.
Ndar a còrer co’ la bicicleta col motor che la é de moda e la costa poc, o anca a pié ma che fa poca comunità specie col “Covid” che ne toca star distanziadi! Portar bonora a spaso al can prima che al fenisse de pelarne la porta de entrata del’apartamento reclamando al dirito ala so’ ora de aria!

Queste e tante altre le é le robe che fa “Domenega” ancoi ma, secondo mì, la roba che ghe manca a sti novi impegni, l’é quela che te dèa l’ocasion no’ solche de trovarte in tanti ma incontrarse “diversi”: omi con anziani, giovinòti con bòce, tose con nòne e cioè an misto de generazion, esperienze e età. No’ sol a compartimenti stagni come ancoi. Adèss se seleziona massa e se sta massa seradi su.

Ancoi che le cése ala domenega le é praticamente quasi vode, sarìa bel trovar insieme ‘na alternativa al fum dele candele e del’incenso che fa brusor ai òci e incontrarse spontaneamente grandi e pìcioi almanco ‘na òlta ala settimana. e questo no’ solche par contarse i pét o ciacolar de aria corénte come che dìss quei che refuda la comunità stessa, ma par sentirse che son paesani, che son tuti ntela medesima barca, che avon spéss bisogn uno del’altro senza vergogna, confidandose e fasendose jutàr co ‘na parola bona, ‘na ociada o ‘na paca sula spala.

WhatsApp, drìo mi, a confronto l’ha ancora tanta strada da far!