Co’ ledaré sto articolo qua, i camp i sarà già tuti aràdi e semenàdi e al sorc e i fasoi romai nassésti. Fin ai ani sessanta / setanta de quel’altro millennio o, par capirse, fin sessanta ani fa, le mansion o lavorazion drio la tèra, le vegnèa fate esclusivamente a man o mèjo co’ l’ausilio de na serie de atrezi.

1930 donne al lavoro nei campi

Prima ancora de far arar, no pì da cubie de bò (coppie di buoi) ma romai dai primi e rari tratori, era da slargàr fora al ledàn che era stat portà fora par temp col car tirà dale vache e stoccà in muci su tut al camp. Muci tipo maruzh o maròt, ognun cuatà (coperto) co’ n cin de tèra, che al ledàn no ‘l disperdesse le so proprietà. Co’ la forca a quatro dènt, al dì prima del’aradura, se slarghèa galìvo al ledàn par tut al camp intant che al nono, co’ la falzh, al seghèa l’erbéta ancora tendra dele teste del camp, par evitar che doman al trator no’ la baleghèsse!

url

Na òlta arà al camp, la squadra da semenzha la se presentèa ntel camp. Al laoro de traciar le combine (righe) che na òlta al vegnèa fat tirando al spago, da qualche an l’era stat sostituì dal moderno “traino”, an atrezhatòio brevetà da me nono. Na specie de restèl magiorà con doi patini regolabili in largheza in base ala necessità de traciar combine da otanta schèi (centimetri) fra lore par al sorc o da setanta come par le patate.
Ntel’ocasion me nono assumèa al ruolo de “geometra” e solche lu podèa strassinar al so traino cargà de ‘n bon sass in modo che i patini i asèsse sula tèra monesina na vistosa riga da seguir. Solche dopo ani, an me fradèl l’ha ciapà la patente del traino e solche parché al nono no l’avèa pì fià da spender!

MDM0270-foto-4-4

Pena traccià le prime righe, entrèa in funzion le seminatrici del sorc. La semenza le la loghèa entro la traversa oltada su e coi cantoi rigiradi entro, par otégner apunto na tasca de contenimento.

Co’ la man destra le tegnèa al badìl (vanga) par al mànego piantandolo davanti a lore e co’ n movimento deventà spontaneo e rituale, le verdèa, ogni vinti schèi, an solco ntela part drio la vanga dove che co’ la man sinistra, le assèa cascar tre, massimo quatro garnèi de sorc. Mistier questo riservà a sole fémene che se dèa na man fra de lore come che se costumèa na òlta. Ancoi te jute mi e doman ti te me rende opera.

Na òlta semenà al sorc, tochèa ai fasoi. Noi tosat, co’ na scarsèla piena de fasoi, se seguìa la linea già evidente e ogni doi pass se piantèa al calcagn sula tèra par logàrghe quatro, massimo zhinque fasoi. Po’ co’ na sfrazhada del pié se i cuatèa (li coprivamo).

Al nono, feni de traciar, al tirèa entro col restèl de fèr la tera che al trator l’avèa spandèst girandose sule doi teste del camp. Ala fin tut dovèa esser net e ordinato! Dopo quindese /vinti dì, co’i fasoi e ‘l sorc i era nassésti e alti sete /oto schèi, rivèa Berto con Lilo al so caval, par grapinar.

Tacà al grapìn drìoghe a Lilo, sto atrezo de fèr con doi aléte che tirèa entro e una central che movèa la tera, al sradichèa le erbe infestanti ntel spazio fra na combina e l’altra. Al resto, cioè sarìr col sàrcol (zappare con una particolare zappa munita anche di due denti), tochèa a noi de fameja. Questa era la mansion pì trista de tute le operazion campestri!
Schena bassa, maniera sul doperar al sàrcol per no sradicar sorc e specie le piantine de fasoi delicatissime, e cavar drio man tuta l’erba infestante: farinèi, belùriga, segalina, pecorìn, gramegna. Fortuna che ogni tant la sàntola o la mama le ne fèa an pinzhòt (ci zappavano un pezzetto) par tirarne avanti la combina. Le teste dele combine e cioè i ultimi doi / tre metri, che in genere i era i pì impegnativi e disordinati, li curèa al nono parché… “fa ben fa mal, fa ben sul cavedàl” (testa del campo). L’é la zona pì in vista e la deve esser perfetta al’òcio de chi che passa e varda!!

Dopo aver sarì o sapà tut al camp, passadi diese dì era ora de dar tèra e cossì a Lilo i ghe tachèa sot al solzharol an varsor con doi ale de fèr che buta una a destra e una a sinistra verdendo la tèra fra na combina e l’altra e dàndoghe apunto tèra ale piantine ormai grandéte. Noi, dopo, se passèa cavando la poca erba restada dal sarìr, drezhando piant, sistemando fasolère, postando ben co’ la sapa la tèra e correggendo schivanèle e musse.

Na òlta fenì de dar tèra, in testa al camp me nono intonèa an “Pater Noster” affidandoghe a Nostro Signor tut al laoro fat e domandando Grazia par an bon racòlt! Difati da adèsso fin ora del racòlt, no se tornerà pì ntel camp. Tut adèss l’é ntele man dela… Providenza!