L’è poc da far, me piase spetar al Veses parché ogni mese al me porta in casa an cin de qualcosa che l’è te le nostre radis. Pensonghe mo… Solo sto an: la neve, magia dela montagna, al laoro, sostanza de l’òn, al bosch, ricchezza dela natura, la fede, alimento de l’anima, la tèra, al grembo de tante vite e ades… l’acqua, la mare de tut.

Crivello – antico setaccio (in questo caso da grano)

La è masa, la manca, la è freda, la scòta, la sporca, la neta; co la manca, la val, co la è masa, la fa mal; la ha dat la vita al mondo, la ha cavà la vita, da Longaron in do; la ha fat da frontiera, e la è stata la strada par scoprir novi mondi.

Sgorbia del XIX secolo

Sion fati de ela e sion nasesti da ela; la ne scampa dale man, la ne fa rider e la ne fa sognar; governada la è na forza: la pompa, la sbufa, la basna, la fa creser,
opur la s-ciòpa, la cuerde, la copa, la nega e la sepolis.

Insoma, sta roba semplicissima e granda mi la vede come an attrezzo che avon in prest (da questo crede che derive al termine inpresta) dala natura e quasi sempre dipende da noi come doperarlo.

No oi far prediche o fufignòt, ma me par bel imaginar che al conoser, al fermarse a pensar (o a leder, come che sion drio far ades) al ne iute a no desmentegarse de aver in man na meravigliosa “scatola dei attrezzi” che, se la conoson e la riconoson, co l’aiuto del zucòt (altrimenti detto “an cin de sentimento”) podon doperarla par aver e far tut quel che ne serve.

E alora, bon laoro a tuti, co ‘n cin de crivèl par separar al bon dal trist, na sgubia par drezar i scronch pì grosi, an sacolet per ligar la lengua se la batolea masa e, sopratuto, an bon soramanego (e questo ve ase a voi catar che che l’è, anca parché… ognun al ha al soo). Ciao bociase!

Breve sussidiario
1 – basnàr: Verbo – macinare;
2 – inpresta: Sost. Fem. – attrezzo;
3 – fufignot: Sost. Masch. – smorfia, boccaccia;
4 – zucòt: Sost. Masch. – zucca, testa;
5 – crivèl: Sost. Masch. – setaccio;
6 – sgùbia Sost. Fem. – sgorbia, scalpello per intagli;
7 – sacolet: Sost. Fem. . ramo di salice intorto
utilizzato per legare

Si ringrazia per le descrizioni del sussidiario il testo: “PAROLE DE NA ÒLTA par nó desmentegàr…” Raccolta di parole del tempo passato, di Dall’Asèn Mara e Dall’Asèn Oliviero.