Ormai de sti ani, qua da noi ntei mesi de genaro e febraro co cambia al temp, no neveghéa pì; al piove. E se ai tempi, quando che ghen fèa trenta-quaranta schèi nte na bòta, te-te catèa laoro par giornade a spalar, vèrder rote, far posto e far stradèle che portèa verso al ledamèr, al cèsso, al seraio dei polàn e la lissièra, ancoi co la piova, vardando dala finestra al tetro e griso panorama da avilimento, te ciapa quela nèssa o sgrégna che se risolve vivadìo, nten sonét del sofà. Sto stato semi-comatoso che te ciàpa anca i òss, al porta la mente a nitidi ricordi de na òlta, ai ani da bocia. E al film al se snoda proiettando figure ormai lontane e inghiotìde dal temp. Alora, vede me nono, pien de mostàci, ndar su ntel fienil par la scala a pécoi e co la brinzhia ntela testa come na gran aureola. Na man tien la brinzhia e una la tien de seguito i pécoi, par no chèjer do. E dopo poc, tornar do co la brinzhia colma-fracada de fien o de foje, par guarnar o starnir i bistian.
La Brinzhia. Sta gran zhesta o canestro fata con sàche de noselèr e sàche de salézh pì fine, intorcolade fra lore fin a otégner sto contenitor che a véderlo someja n’opera d’arte! Manualità, pratica, òcio e fantasia. An contenitor che centralmente sul fondo o sul cul, al riservèa na vèrta tonda dove alogiar la nuca a contato col fien o le foje e con sta brinzhia, tegnendola in calìbrio sora la testa, ndar su o gner do dala scala a pécoi del fienil, mili òlte nten an! Strumenti sparidi insieme ai nostri noni ma che noi anzhianòt, se seron i oci, rivedon ancora nitidi.
Come che anca in ste giornade de inverno, sempre ntel dormiveglia del sofà, ne appare la Mussa portada ntele spale del Barba, che col pass mesurà come an relojo svìzhero al caminèa sul troi che lo portèa su pì in alt dele nostre pedemontane, fin ntei bosc de càrpen o faghèr e pena ruà su ndé che i dì prima l’avea parecià i bòt ben impiladi, dopo aver cargà la mussa al la strassinèa do da bass. Legne segàde do col segon o batéste do co la manèra, netade fora col ronkét o la ronca, sbregàde fora coi cugni e a colpi de mazhùia o co la mazha. E se al terén o al troi l’era ingiazhà, necessitèa i cialt o rampoi par no sbrissar sula jàzha quando che la mussa, stracarga, la frachèa massa ntel cul! Tut oio de comedon!
La Mussa! Sto mezzo de trasporto simile, se dirìa ancoi, an gran “slittino” tut de legn naturalmente e fat tut a man, che ha veicolà a valle mili e mili quintai de legne pareciade dai brazh dei nostri forti boschieri. Quante fadighe, quanti guadagni col sudor!
Adèss de sti strumenti, atrezi o mezzi de trasporto no se ghen vét pì da nissuna banda. Fursi qua e là nten qualche vècio fienil ribandonà, o fursi ntel museo de Seravela a Héss. Pochi, fermi, caroladi! No pì vivi, operosi e in movimento come ani fa!
Nostalgie? Ricordi? Memorie? Fursi anca… no lo so. So però che attraverso sti pensieri da sofà de febraro, se rifà vivi al Nono, la nostra Nona, nostro Barba da maridar restà apunto artelùss e anca la Jeja Roséta o la Jèja Pina. Tante bone persone che ne ha cunà, arlevà, olést ben e che nte la so semplicità tradotta in saggezza, anca solche coi so arcaici strumenti poareti, le ne ha insegnà a viver e star al mondo. Grazie bona dént!
