800 038 499

Numero Verde gratuito

Email

info@ilveses.com

I cereali i torna de moda

Ma no i é zherto ‘na novità

I cereali i torna de moda

Ma no i é zherto ‘na novità

Al dì de ncoi l’é importante esser tifosi drio le soie, ‘vene, forment, ordo e tute quele robe nutrienti che chi che se n’intende i diss che sarà l’alimentazion del futuro. I vegetariani i va tant de moda e l’é na bèla roba parché i segue na dieta alimentare sana e rispetosa dela natura. Mi, per esempio, che me piass ancora tant al cicio e de tute le sòrt, son an cin sul vergognoso e ormai fora schema ma… oléu che, zhèrte passion o apetiti i é duri a morir; porté pasienza e, se podé, perdonéme!

Scherzi a parte, al mondo dei cereali al se impone e al se propone ormai in tante forme o formule diverse che te fa gustar de pì sto prodoto dela natura che vien da secoli indrìo e che da sempre ha nutrì l’umanità. L’é giust riprender confidenza co’ sti alimenti base, che juterà in futuro a consumar manco carne animal a favor dei cereali stessi.

Del resto, de cereali vivon da sempre se pur ntel passà gustadi o còti in modi o par esigenze diverse. Parlar per esempio dela polenta me par an argomento superfluo e ormai descrit in tute le lingue. Sta de fato che qua da noi sto cereale tradoto sork o farina dàla, l’ha nutrì e sfamà generazion intiere.

Anca la carnézha o patùgoi era an alimento fat co’ la farina da polenta. Na polenta sgnèca che vegnèa magnada col sculier tant la era tendra. La scuciaràda calda de carnézha la vegnèa tociada ntela scudèla de lat crut e frét e…entro e do! I boce i ghe ndèa mati! Al “stracafam” (alimento il cui nome non lascia dubbi sul suo primario obiettivo e cioè quello di sedare la fame) l’era invezhe an piato pì poarét. An poc de minestron vanzà, an cin (poc) de lat e tanta farina dàla. Missia, missia e missia e al stracafam l’era pronto par esser consumà a colazion, specie dai tosatèi.

Al forment anca al’ha fat la so part ala grande. I nostri noni i se lo coltivéa, i lo taiéa i lo trebiéa e po’ i lo metéa ntei sac de juta, bel sut su ntel biaèr. Drio man i lo portéa a masnar al molin par otégner la farina bianca. Na òlta ala setimana vegnèa impastà in casa al pan che al gnèa portà a còser nten forno del circondario; dala jèja Tarèsa, pitòst che dala santola o dal barba Fonso. Po dopo, al pan mess nte na zhésta picada su sot an travo de casa, al vegnèa tajà su, na pagnota al dì, dal paron de casa fin che a fin setimana al fil del cortèl al se guastèa, tant era dur al pan!

Qualche òlta par far an cin de festa, la sorèla pì granda fèa su na s-cianta de “trula”, fata sbatendo farina bianca e lat (poc)! Na specie de besciamella che i tosatèi magnèa da ingordi come che fusse budino!

L’ordo invezhe al vegnèa brustolà mediante la bala e cioè mess entro nte na sfera de metal passada sora al fogo del larìn fin che l’ordo l’era brustolà negro. Na òlta fret al vegnèa masnà col masnin e la polver boìsta ntel calierin. Assàdi depositar i fondi, ecco pronto al cafè de ordo! Roba quasi da siori!

In qualche casa ndé che la era pì magra, l’ordo al vegnèa brustolà tajà co’ n poc de forment par sparagnar. Po’ na olta messa a boier la miscela ntel calierin, gnèa dontà na ponta de cuciàro de “estratto”, an concentrato furbo, che ghe dèa color negro all’intruglio.

Insoma i cereali no i é de zherto na novità. La diferenza con qualche decennio fa, l’é che alora tochèa consumarli senza alternativa parché era la fam a comandar. Ancoi, par fortuna se Dio ol, podon anca siélder.

Galleria Immagini

Acegli l’area tematica che più ti interessa oppure clicca sulla casa per ritornare alla Pagina Principale del sito.