Sembrano passati secoli, eppure di molti racconti di chi ha vissuto l’infanzia negli anni 40/50, dunque al massimo di due generazioni precedenti, non c’è più traccia. Nella nostra cultura contadina, ad esempio, il canto è stato un fedele compagno di vita. Esso ha permeato non solo le tradizioni, ma anche il “sentire comune”, ha plasmato generazioni perché, in assenza di mezzi di informazione come tv e web, era un forte strumento educativo.

I RICORDI DI REMO
Dire Remo Monego “Saca”, dei Strambi di Formegan di Santa Giustina, è dire “cantàr”. Dotato di una voce tenorile calda e coinvolgente, è protagonista negli scenari canori da sempre. Racconta di come molto sentite erano le Novene, quel periodo prenatalizio che preparava a concentrarsi sulla vicina nascita di Gesù Bambino: «I era canti che ne portèa verso al Nadàl come “Suvvia fedeli in fretta, Viva il divin Re, Vieni Signor la tera in pianto geme”, l’ambiente l’era quel de la cesa de Formegan. Mesa tute le matine, frèt, pìe done che cantéa; noi boce, mi Guido Giazzon, Franco Mares, braghe curte co’ le calze de lana tacade col boton ale bece, se ‘ndéa olentiera a cantar co le véce, parché dopo mesa se ‘ndèa al panificio de Ferrazzi che l’era calt, e po’ parché i ne dèa an panetin piciol col oio e se ‘l paréa do con al vin che don Vetor al vanzèa nele ampoline che noi chiericheti se ghe robéa.

Prima de Nadal la me fameia la paséa a pagar al cont del libret de la spesa dela Coperativa e i ne déa an toc de mandorlato che regolarmente me mama la scondèa finchè no la diséa ela. Bisognéa far al presepio perché l’era ora de tirar fora an cimelio: le statuine de plastica che me mama la ne avéa portà da la ‘Merica quando che la era stata come balia. Al nostro presepio l’era avanti! L’era an momento de alegria, ma anche de mestizia parché sora al presepio me mare la metéa, oltre che a quatro naranhe, al mandorlato che no se podeà magnar parché “Se al Signor al avèa bisogn!..”, tre candelete che ricordéa i doi me fradelet morti picioi, Flavio e Maria Teresa e so fradel Remo Minella disperso in Russia.

Dopo Epifania, quando che i Re Magi i era scampadi, se podèa magnar, ma intan le ‘narahe le era… ciao!
Ma quel che de pì impresionèa nel cor an boceta l’era al scur. Al scur el frèt de la not de Nadal le te metèa ‘na convulsiòn parché era nasést Gesù Bambino e ala mesa de medanot i cantéa la Pontificalis del Perosi, che rendéa solenne al Nadal.
Nadal l’era improntà sula povertà parché al Signor l’è nasest poarét. Nadal oléa dir far la carità ai poarét, e dir che a casa mea no la era grasa. Me mare la andéa de not col scur, parchè no bisognéa farse veder. La metéa entro an scartoh do figadét, an scorzét, an tochèt de formai, la se tolèa su an boceta e con passo svelto la ‘ndéa su da la Peròta o fin su da Ino Magro, che al avèa già ciapà meda testa del porhel (scarnàda però) e i oss – lucidi come i dent dei can – a altri poarét. Tut questo l’era Nadal!

Visto che a casa mea se ospitèa l’Angelina orba, da ela mi ho imparà alcuni canti, ela la ledéa la musica su i so spartiti coi dèt! Ma al canto pi caratteristico de Formegan al è al Gloria, che cantèa Richeto e la Veronica al di de San Stefen su su la orchestra. Che sgrisoi che al me fèa gner sto canto, son nasèst con quel e moririò con quel! Tant’è che ancora adeso col coro Oio al canton ogni Nadal.

An an don Giusepe Minela, co’ l’era ancora chierico, al convince me pare Nani Strambo a farme cantar la not de Nadal su in orchestra. Nani l’ha proà a dirghe “Varda che su in orchestra ghe ne i cantori co’ la Pontificalis”. Don Giusepe al me insegna sto canto. Riva la not de Nadal su sul telèr de la bicicletà de me pare son partidi a Formegan – regolarmente in braghe curte, ma co le manine entro te le mantese de pél de conicio che me pare al avéa rivestì come guanti le manète del manubrio. Ere talmente agità che mi no ò proprio sentì gnint de frèt. Acompagnà da Bepi Zucco col violìn ò cantà “Che Magnifica notte di stelle che irradia il cammino, quale pace divina solenne al prescelto bambino. Ninna nanna ecc.”, a la fin de la mesa Don Luigi Perotto al me ha dat 5 lire. Mi ere an Siòr. Al Nadal l’era tant sentì, spece se quella not tachèa anca a fuliscar!