I nativi valbelunesi al mar no i stà ben. Te i vede fora par zento mur che i e spaesadi, fiapi, stufi. No i vede l’ora de tornar su te la val. Al valbelunese vero al l’ha massa nostalgia del so decespugliator, del so rasaerba. L’ha paura che i zuchet tel ort i ghe scampe, che i pomidori i ciape la malatia sot la sèra de naylon co sti quatro tubi zincati che i la cen in pie da ani. I slacanc i ghe ha magnà doi olte la salata e le piantine de tegoline, e al valbelunese vero al ol tornar su a farli fora tuti, ormai le na question de orgoglio pì che de prodoto.

Quei da fora no i pol capir in che situazion che se se trova co te ha na setimana , o ancora pedo, doi setimane de mar davanti a ti. Ti e to femena, da soi, magari co i boce picioi e te toca far su castei de sabia e buse fonde par passar al temp. No i pol capir che ti de tut quel mar no te sa proprio gnent e no te ol saverghen gnent. Te te la passa n atimo giusto co te vede na ziesa taiada pulito, an pra cenest meio del too, ma par al resto l’e na soferenza.
An valbelunese vero l’unica sabia che ghe pias l’e quela lavada par far pitume, cavada dale grave del Piave o del Cordeol e ti, valbelunese nativo, an cin de sabia la te serve sempre: ghe ne da getar al muret dell’ort, ghe ne da rifar an toc de marciapié che al se ha guastà co i ani e oltre che immarzì e gnest vert come al muscio.

Na giornada in spiaia le an castigo: butà do tel letin dopo meda ora te ha la siatica che urla vendeta, te ha an braz inzerpedì, la cervicale che la fa mal. Doi fameie da vesin de ti te olarie darghe fogo dopo che i so boce i te ha rot le bale par quatro ore de fila a piander, urlar, magnar, far casin corer, butar su sabia per i oci. Po te fa al bagno. Signor de Dio, iuteme. Ale olte la te par pì calda, ale olte la e freda ingiazada. Te va entro in acqua co le ponte dei piè sperando che no la te rive mai a alteza balote, ma la riva l’onda vigliaca che la fa porconar. Po te sguaterea. E te par par an atimo de esser parfin content, ma dopo che te ha beveast acqua salada la seconda olta te vien da fai i cagnet, te manda tut in mona e te cor fora te la sabia che la te fride le piante de i piè. Te fa la docia giazada e te fa finta de gnent come che fa i altri, ma ti te olarie scampar via parchè par al fret no te ghe riva gnanca a tirar al fià e te someia che al cor al se ferme.

Po riva la sera. Te va a zena, Te se tut net, te te a mes su ncin de profumo da putanon che te te ha catà intro par an casset; braghesse curte al denocio, canotiera vario-colore, sandali co i bus. Te va a cior al gelato ma l’ha massa zuchero e te vien an ataco de mal de panza che te toca corer ala pension de corsa par no fartela sora. Te riva par an pel tel cesso parché su par le scale te ha catà an paesan che l’era amigo de i to veci e no l te mola pì.

Po te va a dormir. Na zanzara scampada ale zavate la te tortura tuta la not. Verso le quatro de matina te te indormenza e te sogna al to let, la to ziesa da taiar, i zuchet, i pomidori, i slacanc. An temporal che rinfresca.

Bone vacanze e fe pulito