800 038 499

Numero Verde gratuito

Email

info@ilveses.com

Ciameghe òc a le ànere

a Nadal intorno ala tola

Ciameghe òc a le ànere

a Nadal intorno ala tola

Mi che son restà tra quei pochi che se sforza de scriver ancora in dialèto magro e strét, mi ho an problema grant. Da diversi ani la television, e no solche quela, la ne propìna dei magnar moderni che a mi, romai veciòt, me fa gner tuti i sgrìsoi e la pèl de pita. Me riferisse il particolare a quei “panét condominio” che va tant de moda in sto periodo. Quei là costruidi cossì: al pian tèra na feta de pan, al primo piano an sbiék de macinato, po-dopo al secondo an radicio o na zhéola cota, al terzo ancora pan e po’ su sora n’altra specie de polpéta starnida con potaci che cola dò dapartut, prima de serar su la costruzhion col colmo del cuèrt fat ancora de pan. Al me problema, fermo restando che no fronterìe sta composizion gnanca se i me paghesse, al me problema sarìe in pratica da dove ciapàrlo par frontarlo. Dal cuèrt? Dale fonde? Dala mansarda o dal primo pian?

Ménela ménela pur-ti Enzo, che quel fora posto te se solche ti! Eh sì, parché se al dì de ncoi te volèsse far an Nadal speciale par i to bòce, al “gesùbambin” pì indovinà da regalarghe sarìa proprio portarli nten quei posti là a magnarse an “panét-condominio”, patatine fritte e Coca cola.
E a proposito de copertina del “Veses”… “ciàmeghe òc-ti ale ànere”, dirà quel de quela òlta! Co’ sti moderni magnar, “lori” i ghe ha indovinà in pieno; altro che òc! Son restà mi e ancora qualchedun pì vècio de mi che par Nadal a tòla sognon ancora an piato de polenta e ànera che te taca tuti i dét, o an bon cunicio nostran e monesin co’ le patate frite tajade su a man, o ancora l’ormai desmentegà dingio col purè (che le nove generazion al dingio oltre che no averlo mai magnà, no i lo ha gnanca mai vist come che l’è fat!). Che feste, che tòle longhe, che fameje grande, che gustosi sti piati de na òlta! Sì, son proprio restà un de “na òlta” parché no rispète gnanca pì al mondo animalista che va tant de moda.

Con tuti sti òss ciuciadi e ingrumadi in parte al piato, segno de poc rispèto.Ma te sa, co’ ghe n’èra ancora tanta voja e an cin de fam, se vardèa poc ale aparénzhe e de pì ala sostanzha! I panét-condominio no i ha entro: al schenon o la zhata o la ala o al còl, chiari segn de na bestiola sopressa. No, la bestiola ntei panét no la ghe n’è o mèjo no te la vét. Ghe n’è solche quei cussinét de roba còta e masnada de mando che no l’è bestia, al’è solche ingrediente e no te vét gnanca i corni!

Gesù Bambin, me rivolge a ti che te se al Vero Nadal, a ti “Parola fatta Uomo”. Fursi no sarà cossì importante se a tòla al dì del to compleano consumeron polenta e ànera opur panét-condominio co le patatine. Ognun legitimamente (almanco fin che podon) sielderà quel che mèjo ghe piass. L’importante invezhe l’è che ti, Gesù Bambin, te sia a tòla con tuti noi possibilmente riunidi in fameje o in grupi che se sforza de olérse ben e crear comunità.

Utopie? Ilusion? Sogni e solite storie? No-no, dipende solche da tuti e da ognun de noi sielder se volon continuar con mondo sempre pì brut o se volon, an pass ala òlta, crear insieme qualcossa de bel. Gesù Bambin, che l dorme sul presepio e al vive dentro al cor de ognun de noi, al ne lo insegna da domili ani.

Bon Nadal (e bon’apetito!) a tuti!

Galleria Immagini

Acegli l’area tematica che più ti interessa oppure clicca sulla casa per ritornare alla Pagina Principale del sito.