Adesso ve conte na storia… Ere picenìn quando che era consuetudine veder, specie d’istà, passar par i nostri paesi, ambulanti co’ i so camius, motorèle o biciclete, zhigando e vendendo dal péss, ale ingurie, ai fighi, opur a raspar su fèr vècio, pèl de cunìcio, pèl de solve, o giustàr pignate pitost che gusàr fòrzhess o cortèi. An dì an novo ambulante, co’ na ciàcola trevisana, al se presenta ntel nostro cortivo par véder se me papà al fusse stat interessà a comprar vin. Bruno, me papà, tocà forse sul’intimo e an cin risentì, al ghe ha rispondest con creanzha ma anca con cin de poffarbìo: «Grazie ma noi avon e beon del Nostro!».

L’arrotino. Particolare della mola montata sulla bicicletta – Foto by Clara Longhini Bosio

Del resto l’é vera che se avèa diverse piantade de vit e ùa de diverse qualità, ma vin bon in casa nostra ghen’avon bevést sempre poc. Na òlta le fioréte, n’altra òlta garbo, mi so che da spess se ghen donèa na damigiana an amigo e collega de laoro de me papà che al provedèa a far sgnapa! Forse ho an poc esagerà ma sta de fato che sti trevisani, ntel giro de pochi ani, i ne ha fat cavar su quasi tute le piantade e comprar al soo, de vin!

Son in otuno e i ha apena vèrt le scole. Zhinquanta/sessanta ani fa ntela nostra faméja se era sie/sète fra fradèi, sorèle e fradelét che se ndèa a scola tuti nte na bòta. La spesa de libri, quaderni e cancelleria varia, la vegnèa totalmente supportada dall’introito dela vendita dei fasoi che, na òlta semenàdi, sapàdi, dat tèra, infrascàdi, sunàdi, sgarnelàdi e curadi, i era pronti da vénder al marcante tombolan (Tombolo, provincia di Padova) de turno. Girèa ntel paese le ciàcole sul prezhio al chilo ma co’ rivèa al marcante, par quant che nostro papà al fusse scaltro a tratàr, i ne li paghèa sempre… an cin manco!

Comunque quel che bastèa par far spesa generale de: libri, sussidiari, quaderni a righe e a quadri, qualche òlta astuci, abbecedario par la matricola de turno, penini, canotti, carte assorbenti, pastèli, matite, gome anca da inchiostro, inchiostro par casa, e, dulcis in fundo, an ròdol de carta a fior che sarìa servida par incartar par ben tute le copertine dei libri, che no le se rovinèsse e no le fèsse le recie durante l’an. Ancora l’eticheta con nome, cognome e classe e al prezioso laoro l’era finì. Che bèl, che profumo da libri e quaderni novi, che siori che se era!

Conclusion de sta storièla: noi belunesi, bonazhòi e onesti, se la son sempre cavada fin adèss, con mistier e dignità ma… che fadiga con quei dela bassa, trevisani o padovani che i sia! Elo vin, elo radìci, èrelo fasoi opur mastèi de plastica da baratar con vèci comò o armeroi dele nostre case che ghe dion drìo olentiera e che dopo lori i rivendèa ai colezionisti, sta de fato che i ne ha sempre an cin ciavà o, come che se diss in italian… fregà!

No l’é mea an pecà, l’é la so natura de marcanti e po’, an vècio proverbio al diss cossì: “Chi no sa far botéga, al… sère (chiuda!)”. L’importante però l’é sempre catar chi che é disposto a compràr, e noi belunesi rispondon quasi sempre: presente!