Te ho vist, sot la piova, in medo ala strada, a netar an tombin pien de fango. Na man co n’ombrela e l’altra co na scoa e na paleta da cu§ina, te fea quasi da rider… se no fuse che te me ha comosso.

Te se anca an bociasa, te podarie eser me fiol (e olarie che tel fuse) e chisà po’ parché, fin a ieri mi credee che te fuse an stracapiaze, un de quei “doveni del dì de incoi” che”i pensa solo che a goderse”, parchè “se ghe fuse ancora la naja”, “ altro si che noialtri ala vostra età” e… e così te ne ha dat na lezion, a noi che avon sempre na bona parola par tuti: “Sarie da far questo, sarie da far quel, l’è colpa del Genio… e de chi che no fa gnent”.

CIACOLE! L’è anca colpa nostra, che ghe ason decider ai altri parché… parché la politica l’è tuta na magnaria; parché la ce§a l’è roba par chi che ghe crede; parché al condominio… mi me fae i afari mei; parché la fameia… e la me libertà?; parché mi… utu far anca che?

Caro tosat, te se ti la nostra speranza, come che l’è sempre stat da quando che ghen è al mondo: i doveni i varda avanti parché l’è là al so spazio. Se po’ dadrio i ha qualcheduni che “paga la spesa”, alora pol darse che i lo riconose e (fursi) i lo scolte, ma a lori ghe interesa de pì al doman, parché quel al è tut soo. E alora grazie, ala to sana incosienza, al coraio spavaldo, al no aver paura de risciar anca a costo de sbagliar, a quel cin de irriverenza, a tut quel morbin che te ha fat olerghe ben… an tombin. Parché da qualcosa bisogna scominziar, e se l’è vera che na bona casa se la imbastis pulito scominziando dale fonde, pol eser che anca na bona vita la pose impiantarse ben anca partendo… dale fogne (se se le mantien nete). Bona pulizia a tuti!