800 038 499

Numero Verde gratuito

Email

info@ilveses.com

Al canton dei bekanot

Mus

Al canton dei bekanot

Mus

Andè che laore ho picà dadrio de mi an cartel con su scrit:“L’è inutile spiegarghe le robe al mus… te perde temp e te infastidis la bestia”. Quando che vede qualcheduni davanti che i lo varda, me premuree de dirghe che al ho scrit par mi (a scanso che no i pose sentirse offesi).

Però l’è an cin vera che pì che gnene grant e manco voia ho de far fadiga a zercar de convinzer chiunque, anca parché tuti i ha le so rason. Sion sempre stati tuti an cin alenatori dela Nazionale, ades sion anca presidenti del Consiglio, vigili urbani, professori, dotori e giudici. La è proprio bela tuta sta sapienza. Co ‘n telefonin se pol saver tut de tut e se pol dir tut de tut e de tuti, che tanto… Mi, par mi, me proe a saver an cin pulito de quel che ho studià o imparà laorando, e se te mel domanda te dae ulintiera an consiglio.

Par al resto, se ho bisogno de qualcosa che no so far, mi vae dal specialista, che sia an mecanico, an beckèr, an comercialista o an dotor. Me pararie pì facile, se ognun al fese pì pulito che al pol al so mestier e dopo al se fidese de quei altri, dove che lu nol sa. Sarie masa bel. E dita questo, ades l’è meio che la moke là par no montar in catedra anca mi, e proe a cambiar discorso…

…intant l’è già ora de pensar al prosimo Nadal, coi panetoi tei scafai già da ‘n mese e toca scominziar a scriver la lista dei regali da far, co la fadiga de catar quel che manca fra “al tut” che già avon. Quindi, pensa che ti ripensa, me par de imaginarme che sarie bel regalar, o regalarse, an cin de temp, che quel al è bon par tuti (e se ‘l vanza podon consumarselo anca noialtri) gustandolo co ‘n cin de pasienza, par andar d’acordo, doi etti de speranza, che ne fa veder an cin manco ombrie e cospirazion e na ponta de matàne, par rivarghe a rider anca de noialtri e dei nostri tic (tok ?).

Co sta lista dela spesa me imagine che anca al menestron de tuti i dì al podarie gner an cin pì bon del solito, e se dopo al magnon insieme a qualcheduni altro… satu che gusto ? Insoma boce (e tose), forza e corajo che al mal l’è de pasajo, e se ghe credon e ghe tendon, ghe ‘ndaron fora pulito da sto afar serio, tuti insieme (mus compresi!).

Bon… e basta!

Galleria Immagini

Hai bisogno di noi? Chiamaci al Numero Verde 800 038 499

Aut. del Trib. di Belluno n. 17 del 24.11.2000. Direttore Responsabile: Federico Brancaleone. Sede Legale: via Pulliere 19 Santa Giustina – Redazione: via Gron, 43 – 32037 Sospirolo (BL) – ITALY. 

Acegli l’area tematica che più ti interessa oppure clicca sulla casa per ritornare alla Pagina Principale del sito.