Al nostro dialeto al è fantastico, al ne permete de spiegarse in poche sillabe ma usando immagini che capis tuti in pressa. Zerche de spiegarme. Par esempio, quando che i olea coionar (e già qua… na parola la dis tut) qualcheduni, dopo magari eserse proadi a farghela capir in tute le maiere, i taiea curt in doi, massimo tre, maniere.

Primo stadio: “Demo, dai, borse fiàpe!” (Qua te avea ancora qualche speranza de dimostrar, dandote na mossa, che no l’era vera). Secondo avviso: “Va là va là, bici da uva!” (Qua ormai praticamente nesuni te dea pì a bado). Terzo e ultimo: “Ma va in m..na !” (No comment).

Se avè fat caso, da spes i doperea termini, come dir “anatomico-intimi”, cioè se te ha da spiegarte in pressa, l’è meio che te dopere parole pi “tera-tera” che te pol. Voi pensarè: “Ma sto qua ollo portarne andè?”. Beh, olee, apunto, portarve, ciapandola an cin larga, a parlar de altri tipi de bici (co le borse) che va de moda ades.

Pensando e ripensando all’istà nova che gnen avanti (intant che speron tuti de rivarghe a vinzer sta guera col virus) fursi la ne permetarà de moverse an cin de pì: scominziaron a ‘ndar an cin pì distanti (ma no masa), stando da novo an cin pì vesini (ma no masa). Morale dela favola, par far tanta strada con manco fadiga sion drio corer tuti a comprarse… la bici elettrica!

A parte che se te la ordina ades l’è meio che te compre dirette anca le cadene da neve parché someia che fin a dicembre (2022) no se ghe rive a averla; mi però me ere ciapà avanti e alora l’è già an toc che la doperee. No ve dighe che gusto! Tranne al mal al cul, che l’è al steso che co la bici normale le prime olte che te va… ma le gambe, al fià e le coronarie le torna idrio de almanco vinti ani e te riva (ancora san) ten posti che no te avarie mai dita, o vist dal vivo. E po’, mi che sono “òmo” ho ciot la “monta-in-bike”, che praticamente l’è doi rode col telèr… che se oi ciorme su an medo panet, me toca meterlo entro tele mudande (quele imbotide … come al panet).

Ma me moglie, saggia donna, la se ha ciot la “siti(= tasi)-bike”, con su tut: luci davanti e dadrio con anca al lampegiante e al campanel par la retromarcia, parafanghi grosi come an paraurti, pompa e camere d’aria (par an pèl no la ha ciot anca la roda de scorta) e, apunto… le borse andè portar tut al “no-se-sa-mai”:

• ricambi par mi, par ela, par sot e par sora (e anca se caton qualcheduni par strada che pol aver bisonch);
• teleta par la piova, capel par al sol (che po’, sora al caschetto oi vederte a meterlo);
• creme e cremete , antizecche-zanzare-vipere e erpès, pronto socorso (al defibrillatore al lo ha ordinà… ma al riva a dicembre), dopia borraccia, caramele fruta seca e cikolata;
• ciavi e luchèt, co na cadena che pesarà almanco medo chilo… e no oi gnanca pensar se se decidese de magnar al sacco…

Morale: ogni olta che avon finì al giro, de solito mi ho ancora quatro tache de bateria e ela, fursi sì fursi no, una o doi.
Par riequilibrar an cin i pesi l’ultima olta la me ha fat cior su anca al can (che, se sa, nol vede l’ora de andar in bici)! E a mi la me va ben, che al ho picenin (al can), ma ho vist in giro par le ciclabili de quei caret a rimorchio (che fin an pochi de ani fa i lo usea solo i tedeschi al mar par portar i tosatei) con de quei vedeloi entro che ghe manchea solo che al cartel dadrio con scrit: “Trasporto animali vivi”. Come che cambia al mondo.

Comunque, come che ve ho già dita, tornar a girar l’è proprio bel. Con o senza bici e borse no importa, basta che se stravione, se catone e se ritrovone. Anca se sion tuti an cin cambiadi, chisà che la avone capida che sta vita la è una, la è bela, e dovon zercar de olerse pì ben che se pol.

Scuseme le ciacole e bone ferie (pedalanti) a tuti.