Foliage le na parola de origine “foresta”, ma se la dopera ormai anca in italian par dir come che le foie de autuno le cambia color. Le poc che i la dopera. Da noi, che vivon par grazia, in medo a pra e bosch al “foliage” se l vedea sempre ma no se savea come ciamarlo. Al masimo se disea: «Varda che bel color che l’ha quel bosc!». Ades, se te ol sparagnar fià, te pol dir: «Varda quel fagher e quel carpen che bel foliage che i ha».

“Sfojar”, inveze, le na parola del dialeto dela Valbelluna, me ocor qualche riga in pi par spiegarla. Sfojar ghe ol dir tirar via le foiole dala panocia. Na roba che i nostri veci i fea e che ades no se fa pì. Co al sorc l’era madur, se tirea do le panoce. Le panoce le vegnea butade al quert sot la tieda. Po dopo, prima che se podea e che no fusse massa moi, e qualche sorz al se interesese al mucio quert da n marot, se dovea “sofojar” la panocia: cavarghe le foie.

L’era an laoro fastidioso, le foie le era ruspeghe, te podea farte anca qualche taiet, ghe olea forza te le man e qualchedun se iutea con toc de lenc a ponta. Le foie pì dure, quele par de fora, i podea doperarle anca par darghele a magnar ale vache. Le foie pi tendre, quele par de entro, i le sechea e le podea eser doperade par imbotir i materas. Ma che bel, tel cortiol rivea amighi, parent, an ombra de vin, na ciacola, an pet da contar. Quanta umanità.

Co le panoce le era seche, inveze, ghe olea sgranelarle e, co le era tante, rivea na machina piturada de ros che par noialtri boce l’era come an mostro che se magnea tut e la fea an gran rumor: da na parte al sorc, da n bus sot la panza i mognoi!

Ah, al mognol, che roba granda!! Al mognol al vegnea mes via in qualche canton solivo dela tieda. Co l’era bel sech al podea eser doperà par impizar al fogo. Qualchedun al dis che l podea servir anca par netarse al cul e che dopo al ardea meio. Mi no ghe ho mai proà, no ho mai avest quel coraio! Sopratuto de portalo in cusina dopo l’uso sanitario e ficarlo te la fornela…

Comunque, par mi al mognol le la sintesi del mondo contadino di un tempo! Laoro, fadiga, pasienza, ripetto per la natura, comunità, non sprecare niente! Tute te ste robe te na parola: MOGNOL! Se dovarie farghe an monumento al mognol! Pensa che bel chel sarie, te na piaza, visin an re, an cavalier, an monsignor, catar an gran… mognol. E, a quei che sa tut lori o a quei che i ol venderne de tut, finalmente se podarie tornar a dir come che me disea me nono co l’era ora de taser: «Metete an mognol!».
Buon… foliage!