Sarà al calt, sarà l’aria de ferie, sarà la voia de straviarse dai pensieri de an mondo che fa al tiro a segno co le vite dei poaret e co le teste dei siori, ma mi ho tanto bisonch de pensar a robe… bele! E la roba pì bela che appie mai proà, la pì granda, che me ha fat piander dal rider, gner le stornerie, sentir le gambe mole e al cor che s’ciòpa… l’è stat… far al amor!
Si, si, proprio quel. Al ha tanti modi par eser ciamà, anca in dialeto. Al pì poaret l’è “far sèso”, la version “musicale” sarie “trombar” (che po’ qualcheduni me spiegarà parché), po’ ghen è anca: “pinciar”, “sifular”, “farsela/farselo”, “darghe intro”… e me fermarie qua.
Someia na roba sporca, così i ha proà a farne creder co se era boce. Zerte robe no se podea gnanca pensarle, figurete ti se se podea parlarghen! Noi sion stati quasi tuti autodidatti (par capirse, tant come par imparar a nodar: “co l’acqua la toca al cul…”). Altro sì che ades, col l‘Educazion Sesuale tele scole (all’affettività, se disarie pì giust) e quela digitale tei telefonin. Mi, l’unica “educazion” (a parte il “fai-da-te” che all’epoca, pasème l’imagine no proprio poetica, l’era “per niente digitale… ma esclusivamente manuale…”) l’educazion, disee, la ho avesta dala sezione dell’intimo su Postal Market, dai libret che me §io1 artelus2 al scondea sora al armeron e dale riviste de “cul-tura generale” che se catea tei muci dela raccolta dela carta fata par l’Insieme si Può. Però, toca dir che la verità pì saggia che me ricorde ancora al dì de incoi, e che ho zercà de insegnarghe a me fioi, l’è quela che me disea la Ieia Maria.3
Ela, che sarie stata la §ia de me nona, vedova e vecia da almanco trenta ani, la stea sempre sentada sul scalin del porton de fora sul cortiol,4 dove che se pasea avanti e indrio noi boce, più o meno grandi, coi primi morbin,5 le prime ociade sot le cotole in zerca de an mondo segreto (e, quindi, ancora pì curioso e appetibile).
E quando che la capia che l’era la ora giusta, la spetea de ciaparne da soli, al bocia e la tosatina de turno (e guai che to pare o to mare i imaginese o i sentise qualcosa) e la se racomandea così: «Tosat… palpé… palpé… Ma palpé… sui sentimenti!».
Dopo, avon fat tuti quanti meio che avon podest e al mondo l’è ‘ndat avanti. Na generazion ghen ha generà an altra, e po’ n’altra ancora, par grazia, e poche altre parole le è state, par mi, pì vere de queste.
Grazie Ieia Maria (e bone “palpade” a tuti).
