800 038 499

Numero Verde gratuito

Email

info@ilveses.com

Al canton dei bekanot

al bon del bel

Al canton dei bekanot

al bon del bel

Quel che ne ocor par andar avanti, se dis che l’è la salute (e quatro skei, parchè po no?). Ma quel che ne ocor par star ben, elo che? A mi me ocor an idea ogni matina, an qualcosa che me interesa, me incuriosis, me fa voia. Questo me ocor. Però, sto tant, no l’è qualcosa che se cata tant facile su’n scafal de’n supermercato o de na farmacia. Quel che zerche al centra poc con quel che ho, no l’è palpabile, … l’è pì na question de CHI che son e CON chi che son.

Mi stae ben, cioè stae meio, se anca TI te sta ben. Ti che te dorme con mi, ti che te zerche par dirte, o par darte, ti che te me cata, o te me ciapa. Voi che ve incrosè con noi, voi che ledè, noi che scrivon, vardon, parlon, scolton, penson, e comunque qualcosa fon.

Ogni àt, ogni moto, ogni sguardo i se porta drio an cin de noi e sempre, se olon, pol eser anca qualcosa de bel. Che incrose an cristiàn, na bestia, an fior, na nuvola, na fregola su ‘n sas ciota su da ‘n panigas, le man ingropade de ‘n vecio o na vita che nas ….. i pupi, ecolo al bel pì bel de tuti.

Chi che ha avest la grazia de aver an fiol nol dovarie, anzi, nol podarà, desmentegarse che che ghe ol dir. E anca se nol fose to fiol, tei oci de an pupo ghen è la medesina pì potente, la ricetta della felicità. Insomma, tosat e tosate, intant che tuti i ne dis che sion sempre pì veci,
vardonse atorno e zerconlo sto BEL che ne fa levar su ogni dì co la voia de viver tut al bon che ne dà al bel de sta vita, che la ghen ha par tuti… Mi dighe che ades, riledendo sti pensieri rodoladi sula carta an cin a sbrindolon, pensarè: «Sto qua al ha da averse fumà qualcosa de strambo!». Macchè! Quel che oi dir, l’è che son stuf de radeghi, fufignot, robe finte e guere vere, e che olarie solo an cin de sincerità, semplicità, speranza e amor.

E se l’è an sogno, alora no ste sveiarme e aseme gustar tut al bon del bel de sta prosima primavera che ha da rivar.
Bon risveglio a tuti.

Galleria Immagini

Acegli l’area tematica che più ti interessa oppure clicca sulla casa per ritornare alla Pagina Principale del sito.