800 038 499

Numero Verde gratuito

Email

info@ilveses.com

Al canton dei bekanot

‘Na sera de istà

Al canton dei bekanot

‘Na sera de istà

Me nono, finì de magnar le sere de istà, al se metea sot al piol a fumar la pipa. Na vide se rampeghea su par i mur. La era vecia e intorcolada, ma fora par al dì la fea ncora na bona ombria tra i mur bianchi e i balcoi vernisadi de smalto vert (verde) ormai smarì. In cusina me mare la lavea do i piati e me pare l’era poià ten divanet a vardar Mike Bongiorno in television.

Mi avee la sguindia de pasar al cortìol, verder al porton e ndar dopo in piaza parchè l’era sagra. I pareci par la festa i era scominziadi già da qualche dì. Primi rivea i carozoi de le giostre, che i se metea all’ombria dei mur alti, che na olta l’era an vecio albergo nde che i dughea ai sboc.

Po’ rivea quei del circo co anca qualche animal strussio e mal doturì. I metea al tendòn visin la piaza, me i ricorde a strisse giale e blu e pien de tacoi.
Al odor de ledàn dele pore bestie e le figure dei “artisti” medi nudi che batea sot al sol su dei gran ciodi par fisarli par tera dove che i lighea le corde par cener fermo al tendon. Altri ìnvez, co gran fadiga, dala zima del campanil fin al balcon del Comun i tirea na corda in fer.
Ala sera dela domenega i avarie tacà le rode de la moto co doi carucole su sta corda e po ghe n’era un mat co n casco in curàn che l’impizea la moto co na gran pedalada, al tirea su del tut al motor senza marmita che al rumor te insemenia e dopo al partia come n razzo e l rivea fin su inzima al fil, po dopo do de corsa, al se fermea in medo su alt e al fea girar la moto tuta intorno, una doi, tre olte… tra l rumor e la paura a mi e a tuta la gente de sot, ne se fermea al cor.

Po dopo ten canton l’era al “fachiro”. Che impresion! Mi al vardee de scondiòn da drio an cantòn de na casa parché l me fea timòr. An on alt, magro, che ghe contee le costole, na corda par zintura, le braghe onte e tirade su sot al denocio, i piè negri, le onge longhe. Mariavergine che impresion. Prima de tut al tirea fora na tola tuta piena de ciodi piantadi par in su. Al se poiea co la schena su la tola, al se fea meter doi foratoi sora al stomego e dopo al ghe domandea a do’ omi grosi de montarghe su!
E lu gnent, gnanca an bus, gnanca na piega. Po dopo al tirea fora an pochi de fondi de botiglia al se meta a mastegarli come che se fusse croste de polenta. Ma la roba che me fea pì impresion l’era quela co le rane. Ten mastel al cenea scondeste sot na cuerta na diesina de ste ranete. Al ciolea an fiasco pien de acqua al se lo beea tut ten fià, po dop n altro fiasco. Al movea la panza intro e fora e su e do e dopo na man tel mastel e… una par una… al se magnea le rane senza mastegarle, fe cont come se al se ciucese na baleta de gelato tuta ten colpo. Po dopo n’altro botiglion de acqua, n altra sguaterada de stomego, al sofiea come an mus e dopo, una par una, al le parea fora par la boca e de novo intro tel mastel! Che spetacolo.

Po dopo tornee a casa. Tel piol ncora al profumo del fun dela pipa. Proee a dormir, ma no lera facile ciapar son: le rece le me fiscea, al cor al me batea forte quela sera de istà.
Fé pulito.

Galleria Immagini

Acegli l’area tematica che più ti interessa oppure clicca sulla casa per ritornare alla Pagina Principale del sito.