800 038 499

Numero Verde gratuito

Email

info@ilveses.com

Al Canton dei Bekanòt

Pèche (impronte, tracce)

Al Canton dei Bekanòt

Pèche (impronte, tracce)

Pèca le na parola vecia. Ghe ol dir, in dialeto dela Valbeluna, “impronta”, “traccia”. No se la dopera quasi pì. Pecà. Na olta ere in Val de Zoldo, tanti ani fa. Matina presto, se era drio prepararse par ndar a siar. An fret bestia, de quei che te taca le man sul fer de na ringhiera, par capirse. Anca quei, “fret” che no ghe ne quasi pi.

Me varde atorno, visin ghe n’era n bosch de pez: scuri, co la neve ncora grapada con le onge del giaz te i ran pesanti. Sente che ho da girarme indrio verso al bosch. Fae doi pas co i scarpoi, la neve la e così dura che sente al famoso cric croc; par sora quela brosa fata de umidità fermada dal fret. Fae fadiga a caminar. Al nas al me cola, le rece quasi le me se staca, mete su al baret. Bute fora fiadùn che someie na locomotiva vecia su par na riva. Varde par tera: te la neve de bombasa portada dal vent, pì lediera le pien de pèche! No l’e n camorz, no l’e n capriol, le sarie pi fonde, te vedarie le do onge che sbusa al bianc. L’e na volp, fursi doi. Lidiere, furbe. Svelte. Le Pèche le se incrosa pi in là, le vede ciare con an fil de luce, freda anca quela, che olsa tra i ran dei pez.

Camìne. Sente qualchedun che me ciama ormai da distante: “Vatu ndeee …?! Varda che no te speton, noi ndon a siar!!”. Che i ndese pur, mi avee na voze pì forte che me ciamea: le ndea visin ai buscat indelidi dal fret, le se incrosea, po una la ndea su par an montesel. Quel’altra, la te la neve alta, la ndea a balegar n pochi de sas visin an roiat dove che sot al giaz te vedea an fil de acqua viva.
Al sol, poaret, al stentea a levar su come che se fa noialtri a tirarse fora dal calduz dele querte. Ma eco!! Le se incrosa de novo!! Mi continue a caminar, ho pers la cognizion del temp. No ho da fermarme, pì che camine pì me scalde! No pose fermarme. Poc lontan vede na macia rossa. Saralo che?

Ghe vae visin, le pèche le e tute misiade fra de lore, sion vesin al roiat. Gioze de sangue dapartut , po, le doi volp, le e scampade, col sò tesoro, una da na banda una da quel’altra. Ho fan anca mi, torne indrio. Son su alt, qua la neve la e dura; vede le crode a pochi metri da mi rosa e bise (grige) da drio al blu senza na neola. Come fae ades? Varde le pèche e ghe core drio, fae la strada in discesa, quasi corendo, sente che le me porta a casa. Rive do stremì, ma son content, me domande parché. Proe a darme na rason: quel dì no ghe ho corest drio a nesun. Quel dì ho sentì qualcosa che me ciamea e che i altri no i ha sentì. No ho mai pì sià in vita mea, ma son ndat tante olte a corerghe drio a pèche che sentie che le me ciamea dal cor.

Che ognun trove le so pèche tel bosch de la vita!
Auguri!

Galleria Immagini

Acegli l’area tematica che più ti interessa oppure clicca sulla casa per ritornare alla Pagina Principale del sito.